شادی سے غربت کا خاتمہ
سیدنا جابر رضی اللہ عنہ سے روایت ہے کہ : " نبی کریم ﷺ
کے پاس ایک آدمی آیا اور فاقے کی شکایت کی ، تو آپ ﷺ نے اسے شادی کرنے کا حکم دیا۔" (تاریخ بغداد : ج1 ص 365 ت
307 محمد بن احمد بن نصر الترمذی)
سخت ضعیف : اس روایت کے راوی ابو عثمان سعید بن موسی بن ابی موسی المدنی کے بارے
میں محدثین کرام کی گواہیاں درج ذیل ہیں:
1: امام ابو حاتم
الرازی رحمہ اللہ نے فرمایا: "اس کی حدیث کوئی چیز نہیں۔ " (کتاب الجرح و التعدیل : 58/4 ت 257)
2:حافظ ابن حبان
البستی نے طویل کلام کے بعد فرمایا: "جب یہ منفرد (اکیلا) ہو تو اس کی روایت سے
حجت پکڑنا جائز نہیں۔" (کتاب المجرحین ج 1 ص 326 ، دوسرا نسخہ ج 1 ص 410)
3: حافظ ابن الجوزی
نے اس راوی کو کتاب الضعفاء المترکین میں ذکر کیا۔ (325/1 ت 1435)
4: حافظ ذہبی نے
اسے دیوان الضعفاء و المتروکین میں ذکر کیا۔ (332/1 ت 1647)
5: لسان المیزان
میں بھی اس راوی کا ذکر بطورِ جرح مذکور ہے۔ (ج 3 ص 41 ، دوسرا نسخہ 290/3)
اس روایت کا ایک اور راوی عبدالباقی بن قانع البغدادی بھی تحقیق
راجح میں اختلاط کی وجہ سے ضعیف ہے۔